Konferenca

Pabarazia dhe drejtësia arsimore: Sfidat shkencore dhe sociale. Universiteti i Bernës, 2-4 korrik.

Në një fshat të vogël në një zonë të thellë malore, një fëmijë hemiplegjik dhe me një vonesë mendore të lehtë, qëndron i mbyllur në shtëpi. Ëndrra e tij? Shkolla fillore. E pamundur për të! Zgjidhja: një gomar! Ai e shpie në shkollë dhe komuniteti mobilizohet. Sot, me mënyrën e tij, fëmija ecën, luan futboll, shprehet, numëron, lexon dhe shkruan.

Në formimin e vazhduar të profesionistëve të edukimit, ky shembull tregon se në çdo situatë, mund të gjenden zgjidhje origjinale për të bërë të mundur aksesin në shkollë.

Familja, Shkolla, Shoqëritë lokale: Politikat dhe Praktikat për Fëmijërinë. Universiteti i Patras, 22-26 maj.

Bashkë me kolegen Anne Rodi, mbajtëm 3 kumtesa të lidhura ngushtë me tematikën e konferencës.

Në kumtesën e parë “Dhe, nëse një gomar do të ndryshonte gjithçka?”, treguam historinë e një djali me një handikap fizik dhe intelektual, i cili shkonte në shkollë me gomar. Nëpërmjet kësaj historie unike, tipike shqiptare u dhamë përgjigje dy pyetjeve të rëndësishme: Cilët janë faktorët e përjashtimit dhe të integrimit të nxënësve, në Shqipëri? Si të ndërtojmë bashkëpunimin shkollë-familje?

Në kumtesën e dytë me temë “Formimi i vazhduar i prindërve dhe i profesionistëve në Shqipëri: një eksperiencë origjinale” paraqitëm konceptin e formimit, të organizimit të tij, përfitimet që patën prindërit dhe profesionistët nga ky formim, vështirësitë e realizimit dhe perspektiva për të ardhmen.

Përmirësimi i cilësisë së jetës së personave në gjendje handikapi: Bilanc dhe perspektiva. Universiteti “Ismail Qemali” Vlorë, 29-31 tetor.

Përmirësimi i cilësisë së jetës së personave në situatë handikapi ka të bëjë para së gjithash me përfytyrimet sociale, vendin dhe rolin që u jep atyre shoqëria. Ai mbështetet paralelisht në masat e vëna në dispozicion të tyre dhe në formimin profesional të personave që merren me ta. Në Shqipëri, në Mal të Zi, në Kosovë dhe Maqedoni, vihet re një ndërgjegjësim gjithnjë e më i madh në lidhje me këto kushte. Përballë gjerësisë së nevojave, duket se është e rëndësishme që aktorët të mund të bashkojnë shqetësimet e tyre, burimet dhe përvojat e tyre. Shkëmbimet që do të bëhen në këtë konferencë ndërkombëtare mund të përbëjnë një faktor dinamik që do të favorizojë zhvillimin e dijeve, të praktikave dhe të mjeteve në fushën e pedagogjisë së specializuar.